ДЛУВ активности

На 10-ти септември годинава, во реномираната галерија „Водникова Домачија” во Љубљана беше отворена самостојна изложба на велешкиот ликовен уметник Живко Пренџов. Насловена „Напуштени ѕидови“ изложбата опфаќа 25 графики на пејсажи и архитектурни амбиенти работени во техниката сериграфија. Пред околу стотина љубители на ликовната уметност од Република Словенија, изложбата ја отвори Мајда Ленич, директор на галеријата. Изложбата предизвика голем интерес во културната јавност во Словенија.
Отворањето беше збогатено и со пригодна културно уметничка програма во изведба на Гудачкиот квартет на Љубљанска филхармонија. Изложбата на Пренџов во галеријата „Водникова Домација” ќе биде отворена до 6-ти октомври годинава. Покрај љубителите на уметноста во Љубљана самостојната изложба на Пренџов имаа можност да ја видат и во Врање и Нови Пазар, Република Србија. Кон крајот на октомври изложбата ќе биде пренесена во галеријата во Кавадарци.

http://www.akademija-art.net/content/view/2358/121/

http://www.veles.gov.mk/index.php?option=com_content&task=view&id=1189

   Во организација на реномираниот „Cultural Arts Center“ од Колумбус во Охајо, САД пред поголем број американски љубители на ликовната уметност, Војко Јаневски се претстави  со слики, акварели, сепии и керамика.
Изложбата беше отворена во галеријата „Main Hall Gallery“ на 18 јули и ке биде отворена се до 17 август.
Војко Јаневски е еден од македонските уметници, чиј опус открива автор со немирен дух на истражувач низ времето и просторот на човековите универзални вредности.
Ликовно опсервирајќи го времето, просторот, природните движења, животот и цивилизациските дострели низ изминатите епохи, притоа селективно со нему својствен  ликовен јазик акцентирајќи ги суштинските вредности низ времето и просторот, реликвиите на предците ги анимира во прекрасни тродимензионални монументални форми со препознатлива патина и ерозија, наталожена низ вековите.
Јаневски на тој начин на своите форми им обезбедува архаичност и патина, инкорпорирана во обликот, композицијата, формата, нагласената структура и нагласените монохромни валери на светло - сенките.

  Изложбата на графики на Живко Пренџов, во техника сериграфија, од Врање се пресели во Нови Пазар. Пред голем број на љубители на уметноста изложбата ја отвори д-р Фехим Хусковиќ.
Делата ќе бидат изложени од 13. 06. до 30. 06. 2009 во просториите на интернационалниот универзитет на Нови Пазар

   На 15 април во галеријата на народниот универзитет во Врање, отворена е самостојна изложба на графики од Живко Пренџов. Пред поголем број посетители изложбата ја отвори Џемил Бектовиќ, историчар на уметност и ликовен критичар од Скопје. Изложбата ќе биде отворена до 30 април.

  Третата по ред самостојна изложба на Татјана Медарова, која на 6. 12. 2008 год. се претстави пред велешката јавност со ликовни дела изработени во четири различни ликовни техники.
Преку изложбата насловена  ОДЗАДКАМЕН, Медарова ни дава повеќе можности за увид во дефинирањето на нејзиниот сложен имагинарен свет, плод на истражувачкиот немир, градејќи го сопствениоткомплексен ликовен систем, трудејќи се да создаде свој препознатлив ракопис.
Медарова дипломирала на ФЛУ во Скопје на педагошки одсек сликарство во класата на Рубенс Корубин.
Се занимава со сценографија, костимографија и дизајн. Изложувала во Софија, Берлин и на повеќе групни изложби.
Тел. 00 389 70 993 997
E-mail: tanjamedar@yahoo.com

Во периодот од 9. Јули до 18. Јули 2008 во планинарскиот дом во село Папрадиште, во организација на Општина Велес се одржа сликарско – копаничарска колонија Папрадишки мајстори. На колонијата учествуваа дваесетина автори од Македонија и странство.

Учесници и дела:

Наташа Божарова, Македонија

Камен Крумов, Р. Бугарска

Александра Петрушевска

Ванчо Кеков, Македонија

Тања Медарова, Македонија

Илчо Стојановски, Македонија

Маја Стојанова, Македонија

Ѓоко Антониев, Македонија

Живко Пренџов, Македонија

Никола Пијанманов, Македонија

Томаж Милоч, Словенија

Ана Милетиќ, Србија

Цветанка Јованова, Македонија

Милован Бекоња, Србија

Тоде Вељановски, Македонија

Драган Зелениковски, Македонија

Јордан Спасов, Р. Бугарска

Зоран Ѓорѓиев, Македонија

Љубомир Бисин, Македонија

Триесетина дела изработени за време на колонијата во техниките масло на платно, акварел, скулптури во дрво и керамика, како и шест резби беа презентирани пред Велешката јавност по повод 9-ти Ноември, празникот на градот.
Изложбата ја отвори Живко Пренџов, претседател на Друштвото на ликовни уметници и координатор на колонијата „Папрадишки мајстори“. Присутни беа стотина посетители меѓу кои и г. Ерван Фуере, претставник на ЕУ за Македонија, градоначалникот на Велес г. Аце Коцевски, градоначалниците на збратимените градови од Р. Србија и Р. Бугарија, македонскиот виртуоз на гитара Влатко Стефановски и др.

   Во четврток 11.09.2008 год. во 20 часот во Ликовниот салон  во Велес отворена е 50-та самостојна изложба на слики, графики и цртежи на ликовниот уметник  проф. д-р. Фехим Хусковиќ.
Авторот  роден е во  Оризари - Велешко 1967  год. Дипломирал на Факултет за ликовни уметности, отсек графика и постдипломски студии, а докторирал на  Софискиот универзитет за ликовни уметности.
Професор е на Академијата за ликовни уметности во Скопје.
Хусковиќ има реализирано над 50 самостојни изложби во земјава и странство, а учествувал на  преку 400 групни излоби и над 60  колонии. Добитник е на 20 меѓународни награди од областа на сликарството, графика и цртеж.

   Широкиот дијапазон на ликовни техники дополнително го вознемирува окото и ве остава немирни додека го гледате неговиот опус.  На изложбата ќе се претстави со  четири издвоени целини. Цртеж со колористична сензација и без неа, динамичен, линеарно чист, лиричен, асоцијативен. Во основа изразноста ја сведува во насока на пејзажот како комплементарен сооднос на сета природа околу. Некаде тој е јасен и доволно асоцијативен, граден со напластување на структура и боја која е на моменти густа и покривна, за подоцна да премине во лирична и транспарентна, поддржана од линеарен колористичен цртеж кој преминува во импресионистичко доживување од кратки силно обоени допири од четка врз претходно изградена подлога. Просторот на пејзажот, од ликовно чиста валерска поставеност, преминува кон структура која е студена и стаклено искршена површина отсутна од живиот предел, потхранета од она што пејзажот го остава по годишниот циклус небаре тој преминал во друга состојба која во себе ја има карактеристиката на вечност (сува гранка, карпа, камен, цвет израснат во малку земја, ветер и сонце – апсорбиран и единствен во целиот предел на сликата). Третата издвоена целина го нема просторниот ефект и како да го изгубила пејзажот, како да преминала во чисто енформелистичко градење на површините или нивно доведување во заемен контакт и визуелен сооднос кој ја гради целата слика. Во овој дел од сликарството кај Фехим се забележува силното експериментирање со материјалите и содржината на сликата. Од колористичното доживување до прашањето на формата или цртежот таа има за цел да премине понатаму кон ново истражување и ликовно искажување.
Хусковиќ во Ликовниот салон ќе се престави со четириесетина  дела.

По повод Новогодишните празници, Друштвото на ликовните уметници на Велес, организираше изложба на слики, цртежи и дела изработени во тековната година. Изложбата беше реализирана со средства од Министерството за култура.

Празникот на градот беше одбележан и со традиционално свечено отворање на изложбата на сликарско копаничарската колонија „Папрадишки Мајстори“ 2007. За љубителите на ликовното творештво овојпат својот свет го открија 18 уметници од Македонија, Србија и Бугарија кои годинава учествуваа на колонијата.
Ликовниот салон блесна со нова уметничка визија инспирирана од убавините на Папрадиште согледана преку делата на уметниците.

Војко ЈАНЕВСКИ e роден 1940 год. во с. Грнчиште, Велешко. Академија за ликовни уметности завршил во Загреб, во класата на проф. Вања Радауш во 1968 год.

Од 1968 год. до 1970 год. бил соработник во Мајсторската работилница на проф. Вања Радауш во Загреб. Член е на ХДЛУ од 1969 год. до 1981 год., а потоа на ДЛУМ од 1981 год. Член е на ДЛУВ од 1973 год. и на ДЛУПУМ од 1974 год.

Самостојни изложби

* Загреб 1970
* Велес 1977,1986,1991,2001, 2001, 2003,2004 и 2007
* Скопје 1981,1994,2000 и 2000
* Куманово 1992 и 2005
* Битола 1993
* Струмица 2002 и 2004.

Има учествувано на повеќе од 200 групни изложби во земјата и странство.

Војко Јаневски е еден од македонските уметници, чиј опус открива автор со немирен дух на истражувач низ времето и просторот на човековите универзални вредности.

Ликовно опсервирајќи го времето, просторот, природните движења, животот и цивилизациските дострели низ изминатите епохи, притоа селективно со нему својствен ликовен јазик акцентирајќи ги суштинските вредности низ времето и просторот, реликвиите на предците ги анимира во прекрасни тродимензионални монументални форми со препознатлива патина на ерозија, наталожена низ вековите.

Јаневски сходно на тематиката и пораката свесно својот најнов циклулус цртежи (асоцијативни форми и слики) го реализира во сепија (анимален пигмент, употребуван во антиката како мастило пo Плинтие, а во втората половина на 18 век наоѓа широка примена во уметноста - акварелог), со големи валерски можности и асоцијатавни ефекти, успешно ја пренесува основната идеја на минливоста и губењето на сјајот на материјалното човеково достигнување.

Јаневски на тој начин на своите форми им обезбедува архаичност и патина, инкорпо-рирана во обликот, композицијата, формата, нагласената структура и нагласените монохромни валери на светло-сенките.

Живко Вегаотвски
Историчар на уметност